Descubrir l’istòria originala de Mowgli

, per  Caillon Dorriotz

La surtida d’una novela version dau Libre de la Jungla de Walt Disney es estat l’eveniment cinematografic de la setmana passada. Fòrça, demest nautres, van menar lors mainatges descubrir quel univers e admirar la performança tecnica que representa queu filme. D’efiech, n’i a nonmàs un actor, lo jòune Neel Sethi dins lo ròtle de Mowgli. Lo demai es daus imatges de sintesi dins un boiradís de tecnicas de juecs videos o de filmes coma Avatar.

Mas nos podem pas empachar de pensar a la primiera version que brecet nòstra enfança, e nos faguet descubrir quela jungla emplida d’animaus fers o simpatics. Pasmens l’una coma l’autra son mas una adaptacion de novelas de Rudyard Kipling, publiadas dins dos recuelhs en 1894 e 1895 jos los titóls The Jungle Book e The Second Jungle Book.

Quel autor britanic nasquet en Índia e i passarà sa petita enfança, davant d’i tornar adulte. Mas quò es au temps de son sejorn dins lo Devon aus Estats-Unis qu’escriguet per sa filha Josephine son òbra la mai famosa. Quelas novelas nos presentan la vida de Mowgli, queu dròlle elevat per daus lops dins la jungla, mas tanben d’autras istòrias que d’unas se passan pas en Índia. Aitau, The White Seal - la fòca blancha - nos mena sus l’isla de Sent Pau, au mitan dau Pacific Nòrd.

Si los dos filmes de Disney reprenen l’essenciau daus episodis e la trama de las istòrias que concernen Mowgli, tot es pas, de segur, identic. Per far descubrir l’originau a nòstres mainatges e mai en profitar nautres, exista una edicion occitana de las aventuras dau petit d’òme. Reviradas per Joan lo Boscassier, chafre de Joan Delheure, las Editions des Régionalismes las an tornadas publiar en 2010. Se pòt trobar en edicion de pòcha en quò d’Amazon mai de la FNAC.

Per los nostalgics dau dessenh animat de 1967, se pòt comandar en DVD o se descharjar: Amazon (DVD), iTunes (descharjament), FNAC (DVD).