La polícia secreta de Tarn desmascada

, per  Caillon Dorriotz

«Dempuei d’annadas, la rumor nos ditz que se passa causas plan estranhas dins los camps de milh. Ara som segurs. La vertat esclata! Lo BIT (Burèu d’Investigacion Tarnés) es pas qu’una legenda. Emai s’ocupa dels afars los mai sensibles e sornes del departament. Mas la lei del silenci, l’omertà, èra plan fòrta en país tarnés. Lo coratjós jornalista d’investigacion Ferri o sap ben. Dempuei d’annadas publica en cò de nòstre vesin franchimand las resultas de sas recercas. Coma a pas jamai pogut trobar d’editor en cò nòstre, publica en Franchimandia son tèxt en occitan. Las revelacions son terriblas! Tarnés! Saupràs tot sus aquela polícia secreta que baileja ton país : las reunions secretas dins los camps de milh, lo nom de son agent mai important, los ligams amb lo gaullisme, l’OMS e lo mitan ecologista, las atacas contra l’agrogenica, l’exilh forçat d’un jove dins lo Peitau, lo dreçatge de las galinas per l’espionatge. Te cresiás viure dins una dolça democracia rurala? Te trompavas! Lo poder te trompava! Apren la tarribla vertat en legissent “Bèstias del Bon Dieu”.»

Veiquí coma, en 2010, Silvèstre Cavalièr, dau Gropament de Rangers Avaironeses, presentava la version occitana d’Aimé Lacapelle que Fluide Glacial veniá d’editar. Quela benda dessenhada d’un umor plen de tendressa per los paisans occitans, es totjorn disponibla per 10,95 € en çò d’Amazon e de la FNAC.