Arthur Conan Doyle en occitan

, per  Caillon Dorriotz

Arthur Conan Doyle es un autor britanic que se presenta pus. Fai partida daus grands noms de la literatura mondiala e de la cultura populara emb son personatge Sherlock Holmes. Mens conegut es lo Professor Challenger, lo scientific irascible que descubret un monde perdut, poblat de bèstias preistoricas.

Pertant si se pòt legir sas òbras en francés o en espanhòu, pauc son estadas tradusidas en occitan. D’efiech, son nonmàs dos los textes de Conan Doyle en lenga nòstra.

Lo primier es l’aventura de Sherlock Holmes la mai coneguda: The Hound of the Baskervilles. Es estada revirada en gascon per Eric Chaplain a las edicions Princi Néguer jos lo nom "Lo Canhàs deus Baskervilles". Puei Sèrgi Viaule ne faguet recentament una version lengadociana: "Lo Gòssas dels Baskervilles". Grand classic dau roman policier, nos conta l’istòria de quela bèstia fera que terroriza lo monde e treva de nuech sus la landa dau Devon. Sherlock Holmes es apelat per protegir Henry,lo darrier dau Baskerville, contra ela e resòure lo misteri de la mòrt de son vielh oncle. Defuntet d’una ataca cardiaca en se permenar sus la landa. Chau dire que quel endrech sembla pas fòrça simpatic, e mai la nuech : «D’aqueste costat, un crest de rocasses s’acabava per un bauç que tresplombava una penda paisselada de pèiras. Sus aquesta penda èra espandit un quicòm de negre. Èra malaisit de precisar çò que podiá èsser.»

La segonda es una aventura dau Professor Challenger - "La Maquina a Desintegrar" - publiada en çò nòstre. Challenger e Malone, un jòune amic seu, jornalista de profession, son mandats per McArdle, director de la Gazette, a l’endavant d’un inventor per escriure un rapòrt argumentat sus la valor de sa descobèrta: la maquina a desintegrar! Quò es una novela plena d’umor que nos fai descubrir lo Conan Doyle qu’escriviá de la sciéncia-ficcion. Es estada revirada per Pascal J. Thomàs, chap-redactor dau fanzine KWS (Keep Watching the Skies!) especializat dins la critica de SF.

Quilhs dos textes son disponibles en version electronica en çò de 7switch: